Azərbaycanın İtaliyadakı səfiri Ermənistan XİN rəhbərinə cavab verib

Ermənistanın xarici işlər naziri Edvard Nalbandyan İtaliyanın “Corriere della Sera” qəzetinə müsahibəsində ölkəsini dünyada qaçqınlar, miqrasiya, milli azlıqlar kimi problemlərə həssas yanaşan, multikulturalizm dəyərlərinə sadiq ölkə kimi göstərməyə cəhd edib, habelə Ermənistan-Azərbaycan münaqişəsi və hazırkı danışıqlar prosesi ilə bağlı təhrif edilmiş məlumatlar verib.
 
Azərbaycan Xarici İşlər Nazirliyinin mətbuat xidmətindən APA-ya verilən məlumata görə, erməni nazirin yalanlarına cavab olaraq həmin qəzetdə Azərbaycanın İtaliyadakı səfiri Məmməd Əhmədzadənin məktubu dərc olunub.
 
“Azərbaycan Ermənistana: “Qaçqınlarla bağlı yalanlar yetər”” başlıqlı yazısında Azərbaycan diplomatı bildirib ki, 20 ildir BMT Təhlükəsizlik Şurasının müvafiq qətnamələrinə məhəl qoymayaraq Azərbaycana qarşı hərbi təcavüz həyata keçirən, Dağlıq Qarabağ bölgəsi və onun ətrafındakı 7 rayon da daxil olmaqla, Azərbaycanın beynəlxalq səviyyədə tanınmış ərazilərinin 20 faizini hərbi işğal altında saxlayan, 1 milyondan artıq azərbaycanlıya qarşı etnik təmizləmə siyasəti həyata keçirərək onların qaçqın və məcburi köçkün düşməsinə səbəb olan, işğal edilmiş ərazilərdə Azərbaycanın tarixi-mədəni irsini dağıdan, eləcə də irqi ayrı-seçkiliyi dövlət siyasəti səviyyəsində təşviq edərək mono-etnik dövlətə çevrilmiş Ermənistan kimi bir ölkənin xarici işlər naziri olaraq E. Nalbandyanın qaçqınların, milli azlıqların problemi, multikulturalizm və sülhdən danışmağa mənəvi haqqı yoxdur.
 
M. Əhmədzadə qeyd edib ki, Helsinki Yekun Aktına əsaslanaraq ATƏT-in Minsk qrupu həmsədrlərinin dəfələrlə verdiyi bəyanatlar və hazırda danışıqlar masasında olan sənəd münaqişənin mərhələli həllində ilkin addım kimi Ermənistan qoşunlarının Azərbaycanın Dağlıq Qarabağ bölgəsi ətrafındakı işğal olunmuş rayonlardan çıxarılmasını nəzərdə tutur: “Lakin Ermənistan bu çağırışlara məhəl qoymur və münaqişənin həlli üçün tərəfləri substantiv danışıqlara çağıran Minsk qrupu həmsədrlərinin bəyanatlarını təhrif etməkdən belə çəkinmir”.
 
Substantiv danışıqların həmsədrlərin qeyri-məqbul hesab etdikləri “status-kvo”nun dəyişdirilməsini, yəni işğal olunmuş Azərbaycan ərazilərindən Ermənistan qoşunlarının çıxarılması da daxil olmaqla, kompleks tədbirləri ehtiva etdiyini bildirən Azərbaycan səfiri vurğulayıb ki, Ermənistan beynəlxalq ictimaiyyəti aldatmaqdansa, münaqişənin həllinə nail olunması və regionda davamlı sülhün təmin olunması üçün hazırda danışıqlar masasında olan sənəd üzrə substantiv danışıqlarda konstruktiv iştirak etməlidir.
Section: